Bilboko Metroan lortutako akordioa babestu dute langileek

Bilboko Metroko langileek baiezko borobila eman zioten atzo zuzendaritzaren eta sindikatuen arteko akordioari, eta grebak etetea adostu zuten. Astearteko bileranbeharginek eta enpresak hitzarmena lortu zuten, enpresak sindikatuek eskatzen zituzten baldintzak onartu ostean. Hala, hilabete eta erdi iraun duen lan gatazkari amaiera eman diote bi alderdiek.

Bilboko Metroko LAB sindikatuko ordezkari Uxune Iriondo pozik azaldu da akordioarekin. «Bezeroei merezi duten kalitatezko zerbitzua emateko beharrezko baldintzak eskatzen genituen guk, eta zuzendaritzak, azkenean, onartu egin ditu», adierazi du. Gainera, hitzarmenari baiezkoa langile guztiek eman diotela nabarmendu du —abstentzio bakarra izan zen goizeko bileran—, ez soilik sindikatuetako ordezkariek.

Trabak gaindituta

Sindikatuek eskatu bezala, metroan 166 gidari eta 182 ikuskatzaile izango dira —orain arte 158 eta 173 ziren—. Gainera, gidari bakoitzak hamar minutuko tartea izango du bagoien funtzionamendu egokia ikuskatzeko,eta ez ditu lanordu guztiak metroaren linea bakarrean pasako, egun osoa lur azpian pasa ez dezan.