Bilboko bi kasuetan iaz inguru horietan egindako obrak jo ditu gehiegizko kutsaduraren ziotzat Ingurumen Sailak. Zumarragako kasuan, berriz, zirkulazio gehiegizkoari eta inguruko industriaren jarduerari egozten dio kutsadura.
Neurketen berri ematean, Jaurlaritzako iturriek zehaztu nahi izan dute neurgailu guztiek datu balekoak eman dituztela hainbat kutsadura motari dagokionez. Zumarragan eta Bilbon egindako neurketa arauz kanpokoetan, hain justu, soilik airean esekita dauden partikulen neurketek gainditu zituzten jarritako mugak.
Aldeko iritzia
Datuen interpretazio orokorra aintzat hartuz, ontzat jo dute Eusko Jaurlaritzako ordezkariek: «Datuek baieztatu egiten dute iragan urteotako bilakaera baikorra». Atzera begirako bat egin nahi izan dute datuen interpretazio egoki hori berresteko. Izan ere, 2006an ezarritako mugak gainditu zituzten neurketa lekuak hamalau izan zirela gogorarazi dute Jaurlaritzako iturriek, eta 2007an sei izan zirela; gainera, ordutik, urtero, soilik hiru lekutan agertu dela gehiegizko kutsadura azaldu dute.
Atmosferan egin beharreko neurketan irizpideak EB Europako Batasunak jartzen dituela gogorarazi du Eusko Jaurlaritzak, eta horren arabera ezartzen direla mugak. Ingurumen Sailak neurketak egiteaz gain kutsadura saihesteko neurriak hartzen dituela gogorarazi du: udal eta enpresetarako proiektuak sustatzen ditu, kutsadura gutxitu dezaten.
