Bart gauean zendu da Claire Haran, Baionako Hotel des Basques hotelaren jabea zena. Haranek 2010eko abuztuan Seaskari eman zion Saint-Andre plazan dagoen lau solairuko eraikina.
89 urte zituela hil da; ez zuen seme-alabarik. Gurasoek 1956an sortu zuten hotela. "Euskararik gabe, galdua da Euskal Herria", azaldu zion BERRIAri Haranek eraikina Seaskari eman ostean.
Eraikinak Hotel des Basques ikurra mantentzea eskatu zion emaileak Seaskari. Lehen aldia izan zen Ipar Euskal Herriko Ikastolen Federazioak higiezinen dohaintza bat jaso zuena; Paxkal Indo lehendakaria "benetan harriturik" azaldu zen keinuarekin, eta eraikina "Seaskaren erakusleiho handi bat" izango zela adierazi zuen.
