Dagoeneko Eusko Trenen zerbitzu guztiak martxan dira

Bizkaiko kostaldeko zenbait herri eta hondartza zuritu ditu elurrak, besteak beste, Bermeo, Sopela, Gorliz eta Muskiz.

Baina, oro har, elurra baino izotza ari da gaur arazo handiagoak sortzen. Gipuzkoan, N-1 errepidean eta A-8 autopistan, Donostiako saihesbidean,horma dago gune askotan, eta arreta bereziz gidatzeko galdegin dute trafiko arduradunek. Izan ere, izotzak erraz eragiten ditu ezbeharrak. Esaterako goizean goiz Irura parean, N-1ean, kamioi bat gurutzatuta geratu da, eta auto ilarak sortu dira. Billabona parean ere auto pilaketak daude jelagatik.

Gipuzkoan jarraituz, Etxegarate, Deskarga eta Arlaban mendateetan arreta handi-handiz gidaltzeko aholkatu dute.

Bigarren mailako errepide sarean, Herrera, Opakua eta Urduñako mendateak itxita daude Araban, eta Gipuzkoan, Elgetan eta Azkaraten, kamioiak ezin dira pasa. Bizkaian kateak behar dira Dima eta Bikoitzgane mendateetan.

Nafarroan, errepide sare nagusian Nafarroa Garaia eta Beherea Alduden barrena lotzen dituen N-138 errepidea itxita dago eta Urkiagako mendatea ere bai. Bigarren mailako sarean, ostera, Artesiagako mendatea, Egozkuekoa, Urbasakoa eta Izabatik Frantziara doan errepidea daude itxita.

Araba, Bizkaia eta Gipuzkoako errepideei buruzko informazio zehatza hemen .

Nafarroakoa hemen.

Eusko Trenek konpondu ditu arazoak

Errepideetan ez ezik, trenbide sarean ere arazoak sortu dituzte elurrak eta izotzak; zehazki, Eusko Trenen zerbitzuan, topoa ez da ibili Oiartzundik Hendaiara bitartean goizeko lehen orduetan, eta Oiartzundik Donostiara bitartean ibili da, baina atzerapen handiz. Halaber, Donostiatik Lasarte-Oriara bitarteko zerbitzurik ez da izan.

Nolanahi ere, Eusko Trenek jakinarazi du arazo horiek guztiak konpondu dituela, eta ondorioz zerbitzu guztiak dabiltzala. Bakar-bakarrik Ermua eta Azpeitia arteko autobusa ohiko bidetik barik A-8 autopistatik dabil, hain justu, Azkarateko mendateak arazoak daudelako.