Boiseko (AEB) Jaialdi festibalak milaka pertsona elkartzen ditu bost urtetik behin. Bertako euskaldun eta euskal jatorriko herritarrez gain, kanpoko 30.000 jaialdizale erakartzen ditu. Aurten egin behar zuten, uztailaren amaieran, baina, ikusita koronabirus kasuak asko ugaritzen ari direla Idahon eta Ameriketako Estatu Batuetan oro har, jaialdia urtebetez atzeratzea erabaki dute, "mundu osoan ditugun lagun eta senideekiko maitasunak eta ardurak eraginda", antolatzaileek mezu baten bidez adierazi dutenez.
Aurtengo Jaialdi festibalaren afixaren detaile bat.
1987. urtean egin zuten lehen aldiz jaialdia, eta bost urtetik behin egiteko ohitura 1990etik gorde dute. Orain arte ez da inoiz bertan behera geratu.
Boiseko Kivitv telebistari eginiko adierazpenetan, Jaialdiren antolatzaile batzordeko Amy Wrayk esan du "zaila" izan zaiela erabakia hartzea. "Baina ez dakigu zer gertatuko den COVID-19ak eragindako egoerarekin, etxean eta atzerrian, eta ez dugu arriskuan jarri nahi jaialdizaleen osasuna". Aurtengoa urte "latza" dela gaineratu du antolatzaileak. "Baina euskaldunak herri zaharra dira, eta lehen ere gainditu dituzte ekaitzak".
Dantzaz, musikaz, bertsoez eta janaz gozatzeko biltzen dira jaialdizaleak Boisen. Antolatzaileek eman dituzte jarraibideak egun aldaketaren inguruan. Sarreren dirua itzultzeko bideak erabakitzen ari dira oraindik.
Koronabirusak sorturiko egoera bereziak ez dio eragingo bost urtetik behin, zeroarekin eta bostarekin amaitzen diren urteetan, ospatzeko ohiturari: 2021ekoa salbuespena izanda, hurrengo jaialdia ez dute egingo 2026an, baizik eta 2025eko uztailaren azken astean.
