Dumont sendiaren hilobian lurperatutako gorpuari ADN frogak egingo dizkiote, Popo Larrerena denetz jakiteko

Landetan, Leongo lakuaren inguruan, tiroketa bat getatu zen duela 20 urte IK-ko kideen eta Frantziako Poliziaren artean. Jean Louis 'Popo' Larre desagertuta dago harrezkero.

Larre desagertu eta egun batzuren buruan, hilotz bat agertu zen Landetako hondartza batean, eta Pascal Dumont itsasoan itotako 15 urteko gaztearena zela esan zuten agintariek. Dumont sendiaren hilobian lurperatu zuten.

Hasieratik, ordea, Dumont familiak zalantza franko izan ditu beren hilobian hobiratua den gorpuaren nortasunari buruz. Behin baino gehiagotan adierazi izan dute IK-ko militante desagertuarena izan daitekeela. Larreren familia ere bat etorri da susmo horrekin, eta batzuk zein besteek, hobiratua den hilotzari ADN frogak egiteko galdegin dute sarri.

Urtetan eskari hori ez dute aintzat hartu, baina, orain, froga horiek egiteko agindu du Bordeleko epaitegi batek. Dena den, Dumont familiak susmo txarra hartu dio oraingo erabaki horri. Izan ere, iragan ekainean hilobia ireki zuten norbaitzuk, eta Ivonne Dumont hildako gaztearen amak Euskadi Irratiari adiearzi dionez, gorpuamanipulatu zuten. "Aspalditik ari gara ADN frogak egin ditzaten eskatzen, eta eskera beti atzera bota dute. Orain, bapatean, denborarik galdu gabe egin nahi dute froga. Nik badakit zein izango den emaitza: 1983an eta 1984an esandakoa berretsiko dute, ezin baitute beren akats bat onartu", adierazi du.