EAJ, EH Bildu eta PSE-EE, frankismoko biktimen kereilaren alde

Frankismoak 1936 eta 1977 artean egindako delituak ikertzen ari da Argentinako Justizia. Eta hamahiru frankistari kereila jarri dien plataformari «babesa» helarazi diete EAJ, EH Bildu eta PSE-EEren Eusko Legebiltzarreko taldeek. Legez besteko proposamena aurkeztu dute hiru taldeek, eta gehiengoa dutenez legebiltzarrean aurrera aterako dela espero da. Frankismoko biktimek «zigorgabetasuna gainditzeko justizia eraginkorraren» eskubidea dutela aitortzen du proposamenak, baita «ordaintza duina» izateko ere. Hiru talde politikoek, gainera, frankismoko errepresioa jasan zuten pertsonak eta senideak kereilak jartzera animatu dituzte. 1936ko «altxamendu faxista» ere salatu dute.