'Egin dezagun bidea' ekimena ibiltzen hasi da, amnistiara begira

Urtarrilaren 8an presoen eskubideen aldeko urratsa egiteko eskatu zutenek jauzi bat egin, eta bidea egiteko eskatu dute; bide osoa egitekoa. Euskal presoak eta iheslariak etxeratuko dituen txangoa, gaurtik egiten hastekoa. Amnistiara begira hasi dira oinez, Bilbon egindako ekitaldian. Presoen eskubideetatik haragoko arrazoiengatik egin nahi dute espetxe politika aldatzetik hasi, eta amnistia helmuga duen lana: presoei eta iheslariei amnistia emateak gatazka konpondu dela esan nahiko duelako; gatazka konponduko bada, beharrezkoa izango delako «gatazkak eragindako kalte eta ondorioak gainditzea».

«Gatazka egoteko arrazoiak preso eta iheslari politikoak egoteko arrazoi berak dira. Horregatik, arrazoi horien desagerpenak, bere ondorioen desagerpena ere ekarri behar du; besteak beste, presoak eta iheslariak etxeratzea, eta aurrerantzean gehiago ez izatea», laburbildu dute Iñaki Olasorok eta Marifeli Etxeandiak sustatzaileen izenean. «Amnistia eta konponbide demokratikoa txanpon beraren bi alde dira». Bidea luzea izango dela ohartarazi dute ekimeneko kideek. Pausoz pauso egin beharko dela, eta maila askotako urratsak eskatuko dituela. Ezer baino lehen, espetxe politika aldatzeko beharraz ohartarazi dute.

Berebiziko garrantzia eman diote urtarrilaren 8an hasitako urratsa «bide geldiezin» bilakatzeari. Herriz herri bilguneak sortu eta «mugimendu dinamikoa» osatzeko deia egin dute horregatik. Bilgune horien bidez hileroko azken ostirala «mobilizazio erraldoi iraunkorra» bihurtu behar litzakeela uste dute, eta presoak euskal herriratzeko ikurrez josi behar litzatekeela Euskal Herria.

Elkarlan esparruak

Euskal Herriko instituzioek, eragileek, alderdi politikoek eta sindikatuek bidea egiten lagundu behar luketela azaldu dute Olasorok eta Etxeandiak. Hortaz, «ekarpena» egin dezaten, elkarlan esparruak abiatuko dituztela iragarri dute.

Esparru horietan, eragileen konpromisoak jaso eta gauzatu nahi dituzte. Instituzioak presoen eskubideen aldeko esparru bihurtzea ere nahi dute. Eta presoen gaia «eztabaida politikoan» ezartzea. Prozesuarekin «konprometituta» daudenek «presoen kolektiboaren parte hartzea ahalbidetzeko konpromisoa» hartzea eta kolektiboaren «interlokuzio iraunkorra» martxan jartzea ere nahi dute. Horrez gain, nazioarteko pertsona eta eragileen «konplizitatea» bilatuko dutela eta elkarlanean sakonduko dutela iragarri dute.