AEBetako Pen klubaren presidente Salman Rushdiek, Otamendiri eta kasuan inplikatutako besteei elkartasuna adierazi die, eta egunkari bateko zuzendariari horrelakoak egiten badizkiete beraiei egindakoa zabaltzeko "aukerarik ez dutenei" zer egingo ote dieten galdetu du.
Torturei dagokionean, Irakekoa ez dela kasu bakarra esan du Rushdiek, eta AEBetan subkontrata bidez lan egiten duten kartzeletan ere "gehiegikeriak" egiten direla.
Nazioarteko Pen klubaren lehendakari Jiri Grusa ere hitzaldian izan da, eta 'Egunkaria' auzian gertaturikoa harrigarria dela esan du. Europan alarma zabaldu behar dela dio, eta neurriak hartu behar direla"zibilizazioa eta kultura babesteko".
"Harrigarria" den arren, 'Egunkaria kasua' ez dela kasu bakarra esan du, Pen klubeko 'Idazle Espetxeratuen Batzordeko lehendakari nagusi Eugene Schoulingek, eta Otamendik bizitakoa Iraken eta Afganistanen gertatzen denaren parekoa dela. Schoulingen iritzian, "nazioarteko terrorismoaren" kontrako borroka bere "komenentziara" erabiltzen du "botereak". Hori Europa osoan gertatzen dela nabarmendu du, jendea beldurrez dagoenean edozer gauza onartzen duelako. Beraz, terrorismoa zer den definitu behar dela iritzi dio.
Ragip Zamakolu editore turkiarrak ere parte hartu du ekitaldian. Behin baino gehiagotan izan da kartzelan, eta orain libre den arren, soto batean dute argitaletxea, nolabait, klandestinitatean. Beretzat, "tamalez", 'Egunkaria'-ren kontrako operazioa ez dela arrotza esan du, eta Turkian ere Gobernuaren linea ofiziala jarraitzen ez zuen komunikabide batetako bi berriemaile torturatu zituztela agertu du. Gainera, 1990-95 bitartean 25 berriemaile hil zituztela gogorarazi du. Komunikabideei babesa eman behar zaiela nabarmendu du, eta horrelakorik ez gertatzeko " urratsak" eman behar direla.
'Egunkaria auzia'
'Egunkaria'-ren itxiera salatu du Salman Rushdiek
Salman Rushdie idazle ezagun eta AEBetako Pen Klubeko presidenteak 'Egunkaria'-ren inguruan gertatutakoa "beldurgarria" dela esan du gaur Bartzelonan, Forumean egindako agerraldian. Pen Klubak mintegia antolatu du han, eta 'Berria'-ko zuzendari eta 'Egunkaria'-ko zuzendari ohi Martxelo Otamendi izan da parte hartzaileetako bat. Hitzaldia bukatu denean prentsaurrekoa eman dute Rushdiek eta Otamendik, eta han 'Egunkaria'-ren itxiera salatu du 'Satanic Verses'-en idazle ezagunak. Josep Bargallo Kataluniako Gobernuko conseller en cap-ak ere salatu du 'Egunkaria'-ren itxiera.
Iruzkinak
Ez dago iruzkinik
Ordenatu
