EHUk 162 milioi jasoko ditu kontratu programetan

GASTEIZ. Eusko Jaurlaritzako Hezkuntza Sailak 235,2 milioi euro jarriko ditu unibertsitateen kontratu programetarako 2023tik 2026rako aldian; aurreko aldian baino %15 gehiago, hots, 35 milioi gehiago. Jokin Bildarratz sailburuak atzo azaldu zuenez, EHU Euskal Herriko Unibertsitateak jasoko du horren erdia baino gehiago: 162,6 milioi euro. Deustuko Unibertsitateari 40,1 milioi emango dizkiote, eta Mondragon Unibertsitateari, berriz, 32,4 milioi.

Horrez gain, Bildarratzek iragarri zuen unibertsitatez kanpoko beketarako zenbatekoa ere handituko dela datorren ikasturtean, %8: 68 milioi euro erabiliko dituzte horretarako, eta areagotzeko aukera ere izango da, «premia baldin badago». Jaurlaritzaren datuen arabera, aurten 207.289 beka eman dizkiete 114.165 ikasleri; horiei berriz bidaliko diete formularioa, osatuta, eskaera uztailaren 18tik irailaren 30era bitarte egin dezaten.