2014ko aurrekontuen datuak begiratuta joan da Goirizelaia Eusko Legebiltzarrera. Diruaren azken urteotako beheranzko joera geratu izana eskertu du, baina ohartarazi du unibertsitatearen aldeko "igoera txikia beharren azpitik" dagoela, 2011-2014ko helburuak betetzeko.
Orain hasiko dira aurrekontuen eztabaidan alderdietako ordezkariak, eta hori dena kontuan hartu eta diru saila "hobetzen laguntzeko" eskatu die alderdietako ordezkariei Goirizelaiak, "gizarteak eskertuko" duela. Unibertsitateak, berriz, dirua "zorroztasun, autoexigentzia, gardentasun eta konpromisoz" erabiliko duela.
Lanpostu guztiak mantendu ahal izateko "doiketak" egin beharko dituztela ere ohartarazi du. Kudeaketa zaila izan arren, saiatuko dira graduondokoen eskaintza hobetzen, ikerketa masterrak bultzatzen eta urtean 400 bat tesi defendatzen. EHUren eskaintza erakargarri egin nahi dute nazioartean ere. Errektoreak aitortu du esparru horretan unibertsitateak "nahikoa hobetzeko beharra" duela.
