Berri agentziek zabaldu zuten albistea atzo iluntzean, Ertzaintzaren iturriak aipatuz —kasua ikertzen ari direla-eta, Ertzaintzak ez du prentsa oharrik atera—. Gaur, Vocento taldeko egunkariek xehetasun gehiago eman dituzte. Ertzaintzak BERRIAri azaldu dionez, ikasle batek egin du salaketa: joan den ostiralean, burua estalitako bi pertsonak eraso ziotela Gasteizko campusean. "Beste batzuek diote gehiago zirela. Ikertzen ari dira. Oraingoz, ez dago besterik", esan dute Ertzaintzako iturriek. Ikaslea ospitalera eraman behar izan zuten, kolpeen ondorioz.
EHUk atzo egin zuen publiko ohar labur bat. "Ikasle batek jasan zuen eraso basatiaren aurrean, Euskal Herriko Unibertsitateak eraso hori erabateko irmotasunez kondenatzen du", esan dute, erasoa jasandakoari elkartasuna adierazteaz gain. "Bortizkeriak ez du tokirik unibertsitatean, ezta hemendik kanpo ere". Gaur, Letren Fakultateak adierazpen bat atera du —hango ikaslea da salaketa jarri duena—, eta elkarretaratzera deitu du astelehenerako; 13:00ean, Letren Fakultateko sarreran. "Unibertsitateko komunitate osoari" egin diote parte hartzeko deia.
Gaur, Eusko Jaurlaritzako Iñigo Urkullu lehendakariak izan du hizpide gertakaria, foro batean. "Erabat gaitzetsi" du erasoa, eta "totalitarismo ariketa" bat izan dela gaineratu: "Bateraezina da gizarte aurreratu baten ereduarekin". Ildo beretik mintzatu dira Ramiro Gonzalez Arabako ahaldun nagusia eta Gorka Urtaran Gasteizko alkatea ere: "Gasteizen ez dago lekurik inolako indarkeriarentzat, ezta giza eskubideen urraketentzat ere". Ahal Dugu-k adierazi du ez dagoela "ez aitzakiarik, ez justifikazio posiblerik" halako zerbait egiteko.
Harago joan dira Espainiako PPko presidente Pablo Casado eta Covite elkartea. Casadok ETAren aipatu du, eta salatu, haren jarduna amaitu den arren, "askatasuna falta" dela eta "erradikalak nahi bezala" dabiltzala. Covite zehatzagoa izan da: "Ezker abertzalearen kideko ikasle taldeak" egin ditu erasoaren erantzule, "ezberdin pentsatzen dutenen aurka indarkeria eta intimidazioa" erabiltzen dutela argudiatuta. Erantsi dutenez, "erasoa jasandako ikaslea eta AEDE Espainiaren Batasunaren Aldeko Ikasle Elkarteko kideak etakideei sistematikoki egiten zaizkien omenaldiak kondenatzeko" bildu ziren erasoaren aurretik.
EH Bilduko koordinatzaile Arnaldo Otegiri ere galdetu diote kasuaz, Radio Euskadin egindako elkarrizketa batean. Adierazi du "espekulatzea" dela erasoa "arrazoi politikoekin" lotzea, eta erantsi du, dena dela, ez zaiola "ondo" iruditzen: "Espainiaren batasuna defendatzen dutenek eskubidea dute hori egiteko, betiere indarkeriarik gabe, hala egiten baitute normalean".
