Sute bat piztu da gaur Arraitz-Orkingo (Nafarroa) etxebizitza bateko sukaldean. 91 urteko emakume bat bizi zen bertan, eta hil egin da. Nafarroako Gobernuak eman du ezbeharraren berri.
Larrialdi zerbitzuek 14:00 inguruan jaso dute abisua, eta suhiltzaileak, medikuak eta Foruzaingoa sutea piztu den tokira joan dira. Suhiltzaileek emakumea kanpora atera dute, konorterik gabe. Hura suspertzen saiatu diren arren, ezin izan dute ezer egin. Nafarroako Gobernuak jakinarazi du tokian bertan hil dela.
Nafarroako Auzitegiko Medikuntzako Institutura eraman dute gorpua, eta bertan egingo diote autopsia. Lehen ikerketen arabera, emakumea kea arnasteagatik intoxikatu da. Foruzaingoa ari da ezbeharraren eginbideak bideratzen.
