Bi autok aurrez aurre jo zuten herenegun gauean Mitikilen (Zuberoa). Bidaiarietako bat, emakume bat, hil egin zen kolpearen eraginez. Istripua 20:25ean gertatu zen, eta suhiltzaileek eta larrialdi zerbitzuek atera behar izan zituzten autoetako bidaiariak.
Autoetako bateko hiru bidaiari zauritu ziren: 77 urteko emakume bat eta 85 urteko beste bat, larri, eta 75 urteko gizon bat. Emakumeak Paueko eta Oloroeko ospitaleetara (Okzitania) eraman zituzten, helikopteroan. Bietako bat hil egin zen gau horretan bertan. 75 urteko gizona Oloroeko ospitalera eraman zuten. Hautsiak ditu saihets hezur batzuk.
Bigarren autoko gizon bat ere zauritu zen, 29 urtekoa. Oloroeko ospitalera eraman zuten. Sudouest egunkariak jakinarazi duenez, Mauleko jendarmeek atxilotu egin zuten atzo arratsaldean.
