Espainiako Poliziak gizon bat eta emakume bat atxilotu ditu Gasteizen, emakumeak sexualki esplotatzea leporatuta; epaileak, halere, aske utzi ditu, epaiketaren zain. Ikerketa joan den uztailean abiatu zen: sexua eskaintzen zuen emakume batek gizonezko bezero bati kontatu zion negozioaren jabeek sexualki esplotatzen zutela, eta gizonak Arabako Atzerritarren eta Mugen Brigadan salatu zuen kasua.
Atxilotuak 68 urteko gizon bat eta 47 urteko emakume bat dira: sexua eskaintzen zuen webgunearen arduradunak dira ustez, eta etxearen jabeak. Espainiako Gobernuak EAEn duen ordezkaritzaren arabera, emakumeak prostituitzera behartzen zituzten, haien «zaurgarritasunaz» baliatuta, «ia andre guztiak» atzerritarrak baitziren, paperik eta baliabide ekonomikorik gabeak.
Hala, haien jarduna erabat kontrolatzen zuten, polizien arabera: emakumeek bildutako diru guztia proxenetek jasotzen zuten eta, eguna bukatzean, aurrez hitzartutako ehunekoa jasotzen zuten emakumeek; 11:00etatik gauerdira bitarte lan egitera behartzen zituzten, atseden egunik gabe, eta etxeko gelak astetik astera alokatzen zizkieten; sakelakoak ere ezin zituzten ia erabili, deiak eta mezuak kontrolatuak baitzituzten.
