Ertzainen postu batzuei bigarren hizkuntz eskaria jartzeko asmoa du Jaurlaritzak

Ertzainen hizkuntz eskakizunak «zorrotzagoak» izango direla iragarri du Eusko Jaurlaritzak. Soilik postu batzuetan beharko dute orain baino hizkuntz eskakizun handiagoa; ez dute jakinarazi zer postutan. Bigarren hizkuntz eskakizuna izango dute «euskara maila altua behar duten postuetan». Hizkuntz eskakizunen inguruan Eusko Jaurlaritzak egina daukan taularen arabera, Ertzaintzako bigarren hizkuntz eskakizuna EGA Euskararen Gaitasun Agiriaren parekoa da.

Jaurlaritzak atzo erabaki zuen ertzainen postu batzuetan hizkuntz eskakizuna aldatzea. Poliziek euskaraz eta gaztelaniaz jakitea duela xede nabarmendu du Herrizaingo Sailak. Lehen hizkuntz eskakizuna daukaten postuetako ertzainek «erabiltzaile independente» izan beharko dute; bigarren eskakizuna «hizkuntz trebetasun jasoak eta bereziak behar dituzten postuetan» ezarriko dute. Hurrengo lan eskaintzetan bigarren eskakizuna zer lanpostuk behar duten esango dute.