Ertzaintzak AHTren aurkako ekintzak "terrorismotzat" jotzeko agindu izanari oso larri iritzi dio ELAk

ELA sindikatuak "oso larritzat eta argitu beharrekoak" jo ditu Eusko Jaurlaritzako Barne Sailak Abiadura Handiko Trenaren gainean emandako aginduak. "Onartezina da azpiegitura honen inguruan edozein ekimen dela-eta terrorismo delitupean jartzeko eta [Espainiako] Auzitegi Nazionalera diligentziak bidaltzeko aginduak ematea", dio ELAk gaur zabaldutako komunikatuan.

"Erabaki hauen atzean AHTren aurkakoak diren zilegizko jarrerak kriminalizatzeko bultzada eta agindu politikoa frogatu da, eta hori guztiz salagarria da ELAren iritziz. Kosta ahala kosta eztabaida sozialik gabe egin nahi izatea azpiegitura hori gutxi ez balitz bezala, AHTren inguruko edozein ekimen zigortze bidean jartzea oso larria da. Esanguratsua da, bestalde, agindu hauek idatziz ematea. Zer-nolakoinpunitaterekin jokatzen duten hau egin dutenek argi islatzen da".

Horren aurrean ELAk hainbat exijentzia egin ditu:

Ertzaintzaren erabilera bukatzea. "Ertzaintza erabili egiten da interes alderdikoiak babesteko eta AHTren inguruan egin daitezken ekimenak, guztiz demokratikoak badira ere, auzipean jartzeko".

Erabakiaren erantzukizunak. "ELAk jarrera eta agindu horiek arbuiatzeaz gain, Barne Saileko erabaki hauetan ardura izan duten guztioi erantzukizunak ezartzea exijitzen du, baldin eta demokraziari eta gizarteari gutxieneko begirunea bazaio".

Agintariei deia. "Alderdi politikoetako arduradun nagusiei dei egiten diegu gai honen aurrean beren jarrera eta balorazioa ager dezaten, honelako agindu eta jokaerekin bat datozen ala ez jakiteagizarte osoaren eskubidea baita".