Hego Euskal Herriko Eskubide Sozialen Karta sortzeko prozesuan parte hartu duten gizarte eragile eta sindikatuetako ordezkariak elkartu dira Bilbon; Ainhoa Etxaide LABeko idazkari nagusia eta Adolfo Muñoz ELAko idazkari nagusia izan dira agerraldian, besteak beste. Sinadura ekintza sinbolikoa egin dute.
Nabarmendu dute "gizarteratze fasea hastea eta atxikimendu aktiboak bilatzea" izango direla orain egitekoak. Sare bat osatu nahi dute, kartaren oinarriak Euskal Herriko txoko guztietara eramateko.
Kartak dituen helburuak zerrendatu ditu Mila Elorza AHT Gelditu koordinakundeko ordezkariak: "alderdi politikoei aurkeztu eta dei egitea, gobernu ezberdinei presionatzea, parte hartzea zabaltzea, indarrean dagoen sistema hobetzea...".
Urtebeteko prozesua
Kartaren lehen zirriborroa iazko urrian egin zuten, eta maiatzaren 31n onartu zuten. Urtebeteko prozesua izan da: bide horretan 1.200 lagunek parte hartu dute Hego Euskal Herrian.
Egitekoen artean Iparraldea prozesuan txertatzea daukatela azaldu dute; haien iritziz, "egitasmoan parte hartu beharko luketen pertsona eta talde ugari" ez daude.
Hemen aurkezpen bideoa:
[YouTube]http://youtu.be/hq2PEFB8JUg[/YouTube]
