Espainiako Gobernuak esan du tortura ez dela «orokorra» izan

Euskal Herrian izandako tortura kasuez galdetuta, Espainiako Gobernuak onartu du «gehiegikeriak noski egon direla», baina horiek «salbuespena» liratekeela, eta tortura ez dela jarduera «orokorra» izan. Barne Ministerioko Estatu idazkari Jose Antonio Nietoren ahotik mintzatu da Espainiako Gobernua, EH Bilduko senatari Jon Iñarrituk galdetuta.

Eusko Jaurlaritzak agindu eta orain hurrengoan plazaratutako txosten batek 1960tik 2014 bitartean izandako 4.113 tortura kasu bildu ditu, eta horretaz galdetu dio Iñarrituk Espainiako Gobernuari. Nietok erantzun du ezin dela «epai orokorrik» egin, eta «aurrera begiratzeko» eskatu dio Iñarrituri: «Erantzukizunak elkarri leporatzeak ez dio bizikidetzari laguntzen».

Torturaren kontrako eguna izango da otsailaren 13a —Joxe Arregi torturaren ondorioz hil zeneko urteurrena da—, eta, hori dela eta, hainbat ekitaldi eta mobilizazio antolatuko dituzte datozen egunetan. Kalera Kalera dinamikak, esaterako, Pariserako martxa egingo du bihar Iratxe Sorzabal presoaren epaiketara joateko, hitzaldi bat egingo du hilaren 13an Irunen (Gipuzkoa), eta hilaren 17an ekitaldi politiko bat egingo du, hori ere Irunen.

Euskal Memoria fundazioak ere torturari buruzko mahai ingurua egingo du otsailaren 16an, Donostiako Carlos Santamaria zentroan, Jose Schulman, Laura Pego eta Eugenio Etxebesterekin.