Euskaltzaindiarekin duen ituna luzatu du Nafarroako Gobernuak

Nafarroako Gobernuaren eta Euskaltzaindiaren harremana 1919an hasi zen; gobernua, hain justu, Euskaltzaindiaren sortzaileetako bat izan zen. Eta erlazioari eusteko asmoa duela argi utzi du berriki euskararen akademiarekin duen hitzarmena berrituta. Xabier Azanza Euskarabideko zuzendariak eta Andres Urrutia Euskaltzaindiko presidenteak martxoaren 14an izenpetu zuten ituna, eta horren berri atzo eman zuen Nafarroako Gobernuak. 2011. urtean Euskaltzaindiak 149.00 euro jasoko ditu Nafarroan egiten dituen jarduerekin jarraitzeko.

Gobernutik jasoko duen diruari esker, Euskaltzaindiak Nafarkaria argitalpena —Euskaldunon Egunkaria egunerokoarekin ateratzen zen astekaria— digitalizatuko du, eta Joakin Lizarraga de Elkanoren lexikoa ezagutarazteko ikerketa ere bai. Horiexek izango dira laguntzaren bi ardatz nagusiak.

2010eko itunean zehaztu zituzten jarduerak ugariak izan ziren: Sakanako Euskara. Burundako hizkera Koldo Zuazoren liburuaren argitaratzea, Perpetua Saragetari buruzko argitalpena, hiztegi judiziala osatzeko jardunaldiak, euskararen onomastika ikertzeko lanak eta Elkartasuna aldizkariaren digitalizazioa.

Nafarroako Gobernuak etaEuskaltzaindiak 2002. urtetik izenpetzen dituzte finantzabidea ituntzeko hitzarmenak. Aurten ere konpromiso horri eutsi diote bi aldeek.