Uztailean lankidetza hitzarmena osatu zuten Eusko Jaurlaritzak, Nafarroako Gobernuak eta EEP Euskararen Erakunde Publikoak. Elkarlanean hainbat proiektu egitea erabaki zuten, eta horietako bat prest dago jadanik: Euskararen Adierazle Sistema. Hiru erakunde horiekin batera, egitasmoan parte hartu dute Arabako, Bizkaiko eta Gipuzkoako diputazioek ere.
Euskararen egoerari buruzko aldagaiak bildu dituzte webgune batean, Euskal Herri osoa aintzat hartuta —aldagai guztietan ez, batzuetan Arabako, Bizkaiko eta Gipuzkoako datuak soilik baitaude—.
Euskarari buruzko hainbat ikerketatako informazioa jarri dute eskura: inkesta soziolinguistikoa, mapa soziolinguistikoa, Arrue txostena, kaleko erabileraren neurketa... Nabarmendu dute proiektuak “izaera dinamikoa” duela, eta osatuz joango direla. Bidenabar, azaldu dute “tresna oso baliagarria” izango dela euskararen egoerari buruzko informazioa emateko eta harekin lan egiteko.
Hemen ikus daiteke webgunea.
