Euskaraz egiteko Mintzalaguna egitasmoan izena emateko epea zabaldu dute

Topagunea Euskara Elkarteen Federazioak zabaldu du aurtengo Mintzalaguna egitasmoan parte hartzeko epea. «Maitasun aitorpen bat» egitera dei egin dute kanpainan: «Maitasun adierazpen bat, azken hamarkadetan euskaldunon mundura hurbildu eta parte izateko hautua egin dutenentzat. Eta maitasun adierazpen bat euskaldunon komunitateko kide izanik komunitatea handitu eta kide berrientzat bidelagun lana egin eta egiten dutenentzat».

Mintzalaguna egitasmoarekin, euskaraz hitz egiteko aukera jartzen diete ikasten ari direnei. 5.000 lagunek parte hartu dute aurreko ikasturtean, 65 herritan eta eskualdetan. Datorren urtean hogei urte beteko ditu proiektuak.