«Ospatu egin behar dugu», zuzendu zen militante jeltzaleengana Ibarretxe, behin eta berriz. «Irabazi egin ditugu hauteskundeak». Eta, aurrera begira, lan egitera deitu zituen, herritarren oihu eta txaloek hizketaldia etengabe moztu eta isiltzen zutela. «Hemendik aurrera guri dagokigu herri hau lideratzeko erantzukizuna». Onenak gara!, Ari, ari, ari Ibarretxe lehendakari! eta Patxi, entzun, Ibarretxe txapeldun! izan ziren herritarrek errepikatutako oihuetako batzuk.
«Ospatzea ondo dago», esan zuen berriz lehendakariak, hemendik aurrera ere lanean indartsu aritzeko deia egiteko. EAJ eta Ibarretxe bera gainontzeko alderdietako ordezkariekin hizketan gaur bertan hasiko dela jakinarazi zuen. «Guri dagokigu elkarrizketak abiatzea eta herriarentzat onena dena bilatzea».
Aurrean zuen «poza eta pasioa» lanera bideratzeko eskatu zien alderdikide eta militanteei. Politika gizatiarrago egin, eta herritarrengana egunero egunero gerturatzeko. Esker hitzak ere ez ziren faltatu. Botoa eman diotenei konfiantza eskertu zien. Eman ez dioten arren hauteskundeetan parte hartu dutenei ere bai. «Heldua» den euskal gizarteari ere bai, eta alderdikideei. «Errekonozimendu» bereziena, halere, familiari eskaini zion, aurrean zuen emaztea hunkitu arazita.
«Emaitza zoragarriekin» EAJ «oso pozik» dagoela azaldu zuen Ibarretxeren hizketaldiaren aurretik Urkulluk. Alderdirik bozkatuena izan zela eta bigarren alderdiari bost eserlekuren aldea atera ziola adierazi zuen, datuen aldaketa etorri eta aldea seikoa zela jakin zuen arte. Ibarretxe lehendakari izateko aukerak egi bihurtu ziren arte.
Zuzendaritza partekatua
Lidergoa EAJk izango duela ohartarazi zuen, ondoren, pozarren. Baina, zuzendaritza hori partekatua izango dela jakinarazi zuen. «Enfrentamendu etengabeen aroa amaitzeko garaia da». Hortaz, gaurtik aurrera, EAJren hiru erronka nagusiak bere egiten dituzten alderdi guztiekin akordioa bilatuko duela hitz eman zuen. Krisiari aurre egin, «etika maila gorago jarri» eta «herria euskal erakundeetatik eraiki» nahi dutenekin. «Batzeko garaia da eta gizarteak esan du EAJk izan behar duela gobernua zuzenduko duena. Ezetz esan dio Ibarretxe kanporatzeari».
