Ezkaba "Iruñerriko talaia" izateaz gain, "oroimenaren talaia" ere badela nabarmendu du Fuga Ezkaba Trail taldeak. "Historiaz beteriko bidexkek egiten dute bat mendi honetan. (...) Bide magiko eta zorigaiztokoak aldi berean, heroikoak bezain tristeak". Hori dela eta, Iruñerriko mendi lasterkarientzako korrikarako ohiko inguru izaten den horretan, "kirolak eta oroimenak bat" egingo duen egitasmoa antolatuko dute.
Mendi igoera "herrikoia" egingo dute, "dortsal eta kronometrorik gabekoa". Parte hartzaileek erabakiko dute bidea nondik hasi eta zein bidetatik egin nahi duen, baina 19:15etan guztiak elkartzeko gune bat zehaztuko dute antolatzaileek eta handik elkarrekin egingo dute gotorlekurako igoera.
Antolatzaileek Ezkabako ihesa oroitzeko egingo diren gainontzeko ekitaldietan ere parte hartzera deitu dituzte herritarrak, "faxismotik, miseriatik eta gizagabetasunetik ihes egitea erabaki zuten" haiek eta preso horiei babesa eta laguntza eman zieten emakumeak oroitzeko.
