'Frontón' saioko larunbatetako partidak igande goizean emango dituzte La Sextan

Frontón saioko pilota emanaldiak ez dituzte zuzenean eskainiko datorren astetik aurrera, Atresmedia taldetik baieztatu dutenez. Maiatzaren 6an itxi beharko du  komunikazio taldeak Nitro katea, Espainiako Auzitegi Gorenaren aginduz. Frontón saioko pilota emanaldiek jarraituko dute. Larunbatetako partidak, baina, igande goizean emango dituzte, 11:45ean. Partidak soilik Internet bidez jarraitu ahalko dira zuzenean.

Bederatzi kate itxiko dituzte asteartean, maiatzaren 6an. Espainiako Auzitegi Gorenak legez kanpokotzat jo zituen 2010an banatutako lizentziak. Hautsak harrotu ditu itxierak. Itxieraren kontrako 123.000 sinadura bildu dituzte Change.org plataforman. Kontsumitzaileen elkarteek adierazi dute telebista eskaintzak nabarmen egingo duela behera. Telebista kateek gogor kritikatu dute Espainiako Gobernuaren jokabidea, eta ohartarazi dute kalte-ordainak eskatuko dituztela. Izan ere, behin-behineko lege xedapen batekin arazoa konpon zitekeen, Auzitegi Gorenak berak sententzian zioen arabera. «Utzikeria» egotzi diote kateek Jose Manuel Soria Espainiako Industria ministroari.