Uribarri Ganboako urtegian dauden Garaioko bi hondartzetan bainatzean adi ibiltzeko eskatu du Eusko Jaurlaritzako Osasun Sailak. Ohar batean adierazi dutenez, azken egunetan "uretako zizare txikiak" aurkitu dituzte bi gune horietan.
Neiker Tecnalia laborategiak eta Farmaziako Fakultateko Mikrobiologia eta Parasitologia Departamentuak aztertutako laginen arabera, zizareek ez liekete berez kalterik eragin behar bainu hartzaileei.
Edozein arazo saihesteko, sorosleek markatutako guneetan ez bainatzeko aholkua eman du Osasun Sailak.
Animalia horiek Arabako urtegiko uraren kalitate onaren erakusle direla adierazi du Osasun Sailak, zizareak "ongi oxigenatutako" uretan agertzen baitira.
