Gasteizko Martxoaren 3ko hilketak gaitzetsi ditu Eusko Legebiltzarrak, eta elkartasuna adierazi die biktimei

Jaurlaritzako Hiruko Gobernua osatzen duten alderdien eskutik —EAJ, EA eta EB-IU— heldu da Eusko Legebiltzarrera Martxoaren 3ko biktimei elkartasuna eta babesa adierazteko ekimena. PSE-EEko taldearekin zuzenketa bat adostu dute hiru alderdi horiek, eta, azkenik, SA Sozialista Abertzaleak taldeak ere ebazpenaren alde bozkatu du. Beraz, PP da akordio horretatik kanpo geratu den alderdi bakarra.

1976ko martxoaren 3an Espainiako segurtasun indarrek hil zituzten bost lagunen senideek Estrasburgoko Giza Eskubideen Tribunalera zein Nazio Batuetako Giza Eskubideen Batzordera jotzeko asmoa dute duela 27 urteko gertakari haiek argi daitezen eskatzeko, eta segurtasun indarren gidaritza izan zutenei ardurak galdegiteko. Eusko Legebiltzarrak babesa eskainiko die senideei ekimen horiek aurrera eramateko.

Nolanahi ere, Europara eta Nazio Batuetara jo aurretik, Martxoaren 3ko biktimen elkarteak Espainiakobide judizial guztiak agortu ditu justizia eske, baina ez dute ezer lortu.

Halaber, terrorismoaren biktima gisa onartuak izateko eskakizuna egin zuten, baina Espainiako Barne Ministerioak ukatu egin zuen gertatutakoa ekintza terrorista izan zenik. Hori gutxi balitz bezala, aurreko uztailaren 2an, Espainiako Auzitegi Nazionalak eta Auzitegi Konstituzioanalk auziaren gainean jarritako helegite guztiak atzera bota zizkieten, eta, ondorioz, Espainiako bide judizialak agortutzat eman ditu biktimen elkarteak.