Gazteak elkartu eta auzolanean eztabaidatu, gozatu, ikasi, trukatu eta sortzeko aukera izango da Gazte Danbada, antolatzaileek azaldu dutenez. Tailerrak, hitzaldiak, mahai inguruak, antzerkiak, kale animazioa eta kontzertuak izango dira, besteak beste.
Irailean Zukgua prozesu eratzaileari ekin ziotenetik ehunka lagunek parte hartu dute hausnarketan eta eztabaidan. Prozesu horren helburua "independentzia eta sozialismoa erdiesteko gazte estrategia definitu eta hori garatuko duen antolakundea gorpuztea" izan da, haien arabera.
Helburu hori betetzat jo zuten, martxoaren 2an Lizarran egindako kongresuan: "Orain Ernairi ongietorria emateko modu paregabea dugu aurrean".
