Carmen Lamela epaileak baldintzarik gabe espetxeratu zituen Altsasuko zazpi lagunak, bi guardia zibil eta haien bikotekideak jotzea egotzita. Behin-behineko espetxeratze horien kontra helegitea jarri zuen defentsak, eta Auzitegi Nazionaleko laugarren zigor aretoak gaur hasi da epailea aztertzen espetxeratze horiekien aurrera jarraitu edo ez.
Jose Perals fiskalak espetxean segi dezatela eskatu du, argudiatuz gazteak direla. Fiskalaren ustetan gazteak ez daude zaharragoak bezain errotuak, eta horrek ihes egiteko arriskua areagotzen du, bere ustetan. 19 eta 24 urte bitartean dituzte espetxean dauden zazpiek. Terrorismoa leporatu izanak ihes egiteko arriskua handitzen duela ere esan du.
Erabakiak erabaki, bihar, epailearen aurrean deklaratu beharko dute, berriz ere, auzian nahastu dituzten 11 gazteek, eta biharko, giza kateak deituta daude Altsasun eta Sakanan, gazteak libre uzteko eskatzeko.
"Euskal Herri osoan eragina duen zerbait dugu gure aurrean. Altsasun gertatu dena Euskal Herriko edozein lekutan gerta zitekeen", ohartarazi zuten Altsasukoak Aske plataformako kideek, mobilizazioak iragartzeko emandako prentsaurrekoan.
Auzipetuei eta haien senideei elkartasuna adierazteko asmoz, giza sarea egingo dute hilaren 20an, arratsaldeko zortzietan. Ordu horretan Iortia Kultur Gunetik abiatuko dira zortzi edo bederatzi giza kate; auzipetuen etxeetarainoko bidea egingo dute, eta handik berriz plazaraino.
Bestalde, plataformak salatu du hainbat komunikabidek auzipetuen argazkiak zabaldu dituztela, haien defentsa eskubidea eta errugabetasun printzipioa urratuz. "Horregatik, asteartean, gure auzokideen askatasuna eta zirku honen bukaera aldarrikatuko dugu".
