Gipuzkoako 36 udalek, Gipuzkoako Foru Aldundiak, Uema Udalerri Euskaldunen Mankomunitateak eta Urola Kostako Mankomunitateak ezarriko dituzte hizkuntz irizpideak kontratazioetan. Lantalde bat aritu da irizpideak bateratzeko lana egiten, eta orain bat egin dute harekin udalek; oraindik falta dira udalak zerrendan, eta jakinarazi dute bat egiteko aukera badagoela.
Zigor Etxeburua Gipuzkoako Diputazioko Euskara zuzendariak adierazi du "hutsune bat betetzera" datorrela neurri hori. "Aurrerantzean, toki administrazioek beste tresna bat izango dute erabiltzeko moduan, hizkuntzaren normalizazioan". Nabarmendu du enpresentzat ere abantaila izango dela hizkuntz irizpide estandarizatuak izatea erakundeetan: "Errazagoa izango da haientzat, erakunde asko logika berean arituko baikara. Merkatu berri bat sortuko da haientzat".
Zehazki, honako hau arautuko dute erakundeek kontratazio publikoetan: zerbitzu hizkuntza zein izango den, zerbitzu kontratuetan enpresako langileei eskatuko zaien hizkuntz gaitasuna, hizkuntz paisaia zein hizkuntzatan izango den (errotuluak, oharrak...), herritarrei harrera nola egingo zaien eta administrazioarekin harremana zein hizkuntzatan izango den. "Elebitasuna bermatuko duten baldintzak proposatzeaz gain, beste bide bat ere urratu nahi da; hau da, euskarazko bidea", adierazi du Gari Berasaluze Zarauzko zinegotziak. Hots, prestazioaren berezko ezaugarriek kontratua euskaraz gauzatzea eskatzen badute, horrela egiteko baldintzak eskatuko dira.
Gipuzkoako Foru Aldundiak urrian jakinarazi zuen hizkuntz irizpideak txertatuko zituela lehiaketa publikoetan.
