Paperik ez daukaten etorkinak ohiko osasun arretatik kanpo uztea Gipuzkoan ere eragina izaten ari dela salatu du Jatorri Anitz Herri Bat elkarteak. "Gertaera errepikatuak" izaten ari direla berri eman du; besteak beste, etorkinei osasun txartelik ez dietela ematen, eta larrialdietara bideratu ondoren fakturak ematen dizkietela. Diarreak jotako ume baten gurasoei, adibidez, 150 euroko faktura eman zieten ospitalean, elkarte horren arabera.
Ohartarazi dute, gainera, oinarrizko gizarte laguntzetan eta egoitza baimenetan trabak daudela; laguntzak atzerapenez iristen zaizkie behar dituzten pertsonei, eta salatu dute Espainiako Gobernuak Gipuzkoan daukan ordezkaritzak "sistematikoki" ukatzen dituela egoitza baimenak.
Egoera hori ikusita, maiatzean protesta hainbat antolatzeko asmoa du Jatorri Anitz Herri Bat taldeak.
