6.370 kilometro, Ozeano Atlantikoan: horixe da Gipuzkoako kostaldean, Donostiatik hogei kilometro iparraldera, 2006ko urrian markatutako eta askatutako hegaluze batek lerro zuzenean egin duen ibilbide luzea. Arraina Venezuelan harrapatu dute arrantzale batzuek.
Atlantikoko Hegaluzea Kontserbatzeko Nazioarteko Batzordean (ICCAT) erregistratutako hegaluzeen artean distantzia luzeena egin duena da. Markatzeko unean, arrainak urtebete zuen, 50 zentimetroko luzera eta 2,5 kilogramoko pisua. Harrapatu dutenean, sei urte eta erdi geroago, 21,8 kilogramo eta 100 zentimetro zituen.
Atlantikoa zeharkatu duten hegaluzeei buruzko oso erregistro gutxi dago, AZTI-Tecnaliak jakinarazi duenez.
