Ertzaintzak 53 urteko gizonezko bat atxilotu du Barakaldon (Bizkaia), ama hil izana leporatuta. Zehazki, emakumezkoa joan den apirilaren 26an zendu zen, Gurutzetako ospitalean. Semeak orduko hartan emandako bertsioaren arabera, emakumea erori egin zen, eta horrek eragindako lesioengatik hil zen gero. Ordea, erietxeko osasun langileek indarkeria zantzuak sumatu zizkioten hilotzari, eta forentseei eman zieten abisu. Semea atzeman dute gaur, lesioak hark eraginak direlakoan batik bat.
Eusko Jaurlaritzako Segurtasun Sailak emandako datuen arabera, Ertzaintzaren ikerketan ondorioztatu dute, gainera, emakumezkoak ez zuela behar adinako mediku arta jaso lesioak jasan ondotik. Hau da, zehaztu dutenez, ospitalera eraman zutenerako oso larri zegoen.
Atxilotuak emakumezkoa hil duela baieztatuko balitz, aurten Euskal Herrian izandako bigarren hilketa matxista litzateke, 114.-a 2003tik.Kontsultatu indarkeria matxistaren Euskal Herriko datuak, hemen.