Atzo arratsalde hondarrean gertatu zen istripua: bi autok elkar jo zuten, parez pare, suhiltzaileek erran dutenez. Autoetarik batean zegoen 73 urteko gizonari sokorri ekartzen entseaturik ere, ezin izan zuten salbatu.
Gizonarekin zegoen 63 urteko emazte bati ere sokorri eman diote, autoan blokeaturik baitzegoen: bertatik atera, eta Baionako ospitalera eraman dute, oso larri.
Bigarren autoan beste gizon bat zegoen, 40 urtekoa, eta salburik atera da istriputik.
Hildako bat Trebiñun
Atzo gauean, berriz, auto istripu bat gertatu zen Trebiñun (Araba), eta pertsona bat hil zen. Beste bi herritar zauritu ziren, 112 Larrialdi Zerbitzuak jakinarazi duenez. Hain zuzen, Armentian gertatu zen istripua, eta hiru lagunak autoaren barruan harrapatuta geratu ziren. Abisua jaso zutenean, istripua gertatu zen tokira hurbildu ziren suhiltzaileak.
Osasun langileek tokian bertan baieztatu zuten herritarraren heriotza, eta beste biak artatu zituzten.
