Iruñeko Udaltzaingoa eta Espainiako Polizia gizon baten heriotza ikertzen ari dira Iruñeko Donibane auzoan. Gaur goizean, pakete banaketako enpresa bateko banatzaile batek gizonezkoaren hilotza aurkitu du Olivako Monasterioaren kaleko lehen zenbakian, bigarren solairuko eskailera buruan: buruz behera zegoen lurrean etzanda, eta, haren azpian, odol putzu handi bat. Hori ikusita, larrialdi zerbitzuetara deitu du banatzaileak.
Udaltzainak bertaratu direnean, labana bat topatu dute gorpua zegoen tokitik gertu, eta ikusi dute aldameneko etxebizitzara sartzeko atea zabalik zegoela.
Udaltzaingoak aurkikuntzaren berri eman dio Iruñeko 4 zenbakiko Instrukzio Epaitegiari, eta ikerketa abiatu du, zer gertatu den argitu eta hilketaren egilea topatze aldera. Espainiako Poliziaren Brigada Zientifikoa ere Donibane auzoko eraikinera bertaratu da, ikerketa teknikoa egiteko.
