Gasteizko Udaltzaingoak 26 urteko gizonezko bat atxilotu zuen atzo, bikotekidearen kontrako jazarpena eta tratu txarrak egotzita.
Udalak azaldu duenez, 12:15 aldera, udaltzainek abisu bat jaso zuten, gizonezko bat emakume bati jazartzen ari zitzaiola esanez. Hala, Babesgabeak auzoan patruilatzen ari zen agente talde bat joan zen etxebizitzara.
Udalaren arabera, gizona etxebizitzako ateari kolpeka ari zen etengabe, baina agenteak iristerako ez zegoen han. Udaltzainek hura topatzeari ekin zioten. Aurkitu zutenean, gizonak ihesari ekin zion, baina handik gertu atzeman zuten, eta atxilotuta eraman. Udalak gehitu du biktimak lesioak zituela, eta gizon horrek eragin zizkiola.
Foruzaingoak, berriz, bederatzi gizonezko atxilotu ditu asteburuan Nafarroan, emakumeen kontrako tratu txarrak edota urruntze aginduak apurtzea egotzita. Hiru gizonezko atxilotu dituzte Iruñean, eta bana Azkoienen, Fustiñanan, Lizarran, Elizondon, Tuteran eta Burlatan.