Elkarrekin Podemos koalizioko lehendakarigai Miren Gorrotxategik babesa azaldu dio Korrikari, eta «herritar guztiek euskara doan ikasteko eskubidea» aldarrikatu du: «Askoz gehiago inbertitu behar dugu euskara aisialdian, kulturan eta ingurune digitaletan sustatzeko eta, batez ere, gizarte osoak euskara ikasteko aukera izan dezan bermatzeko. Aurrera egin behar dugu euskaraz jakiteko eta ikasteko eskubidearen unibertsalizazioan».
Gorrotxategik esan duenez, C1 maila lortu arteko ikaste prozesuak «erabat doakoa» izan behar du, eta iragarri du EPk jarraituko duela «kontziliazioaren eta ordu malgutasunaren alde» egiten helburu hori lortze aldera: «Doako euskara eskolak behar ditugu herritar guztientzat».
Azaldu duenez, EP «buru belarri» arituko da Korrikaren alde, eta koalizioaren ordezkariek hamar kilometrotan parte hartuko dute euskararen aldeko lasterraldian: Gasteizen, Durangon (Bizkaia), Irunen, Errenterian eta Beasainen (Gipuzkoa), besteak beste.
