Bi pertsona hil dira gaur, Puiun (Nafarroa) eta Errezilen (Gipuzkoa), trafiko istripuan.
Puiuko ezbeharra 15:00ak aldera gertatu da, N-121ean. Auto batek eta kamioi batek elkar jo dute Iruñea eta Tutera lotzen dituen errepide horretan. Turismoaren gidaria —bakarrik zihoan— hil da ezbeharraren ondorioz. Kamioia irauli egin da, eta, errepidea oztopatzen ari zenez, bidea itxi behar izan dute, eta AP-15 autobidetik bideratu dute trafikoa. Suhiltzaileak, anbulantziak, Foruzaingoa eta Guardia Zibila bertaratu dira istripua gertatu den lekura.
Beste hildako bat izan da Errezilen, GI-2634 errepidean. Motor bat bidetik irten da, eta gidaria hil egin da ezbeharrean. Ertzaintzak jakinarazi du ikerketa bat abiatu duela istripuaren zergatiak argitzen saiatzeko.
