Koronabirusaren aurkako prebentzio neurri gisa eta hondartzetan jende kopurua kontrolatze aldera, Gipuzkoako eta Bizkaiko aldundiek martxan jarri dituzte telefonoetarako aplikazioak. Nik hondartzak du izena Gipuzkoako Foru Aldundiak Aztirekin elkarlanean sortutako aplikazioak, eta BizkaiUP aplikazioaren bitartez izan daiteke Bizkaiko hondartzen egoeren berri.
Koronabirusaren gaitza gehiago kutsatu ez dadin, gizarteak arduraz jokatzeko tresna erabilgarriak sortzea izan da foru aldundien helburua. Gehienbat, balio du erabiltzaileek etxetik atera aurretik jakiteko nola dauden hondartzak, eta, beraz, arrisku egoerarik ez sortzeko.
Nik Hondartzak espresuki horretarako sortutako aplikazio bat da, eta etengabe eguneratzen da; hortaz, hondartza bakoitzaren okupazio denbora errealean kontsultatu daiteke. Bizkaiko kasuan, ordea, BizkaiUP aplikazioak beste zerbitzu batzuk eskaintzen zituen lehendik, eta egun koronabirusaren gaineko informazioa emateko baliatu dute, besteak beste.
Gomendatutako distantzia soziala kontuan hartuta eta hondartza bakoitzaren tamaina aintzat hartuta neurtzen da edukiera bietan, eta informazioa kolore kode baten bitartez eskaintzen da: berdeak okupazio txikia dagoela esan nahi du; horiak, erdikoa; eta gorriak, handia. Aplikazioak Android eta IOS gailuetarako prestatu dituzte, baina, dena den, webgune berezi bat ere sortu dute aplikazioa deskargatu gabe online kontsultatzeko.
