Bermeon, haize boladak 149 km/h-ko abiadurara iritsi dira gaur goizean; 147 km/h ingurukoak izan dira Karrantzan ere. 15:00ak arte, haize arriskua adierazia du Eusko Jaurlaritzako Segurtasun Sailak. Kostaldean 100 km/h-ko haizea espero da oraindik ere, eta 80tik gorakoa mendi inguruan.
Bizkaian, hainbat errepide itxi dituzte haizeak eragin dituen kalteen ondorioz: BI-3438 errepidea Ondarroa eta Lekeitio artean, BI-631 Bermeon eta BI-623 Urkiolako igoeran, besteak beste. Gipuzkoan, berriz, A-8 errepidean eragin du haizeak, Errenteria parean zuhaitzak erori baitira bidera, Irungo noranzkoan.
Donostian 120 km/h-ko haize boladak izan dira Santa Klara irlan, eta Madrildik Hondarribiko aireportura zihoan hegazkin batek Iruñean lur hartu behar izan du. Gipuzkoako hiriburuan hainbat kale itxi behar izan dituzte, haizeak eragindako kalteen ondorioz: horien artean, Askatasunaren hiribidea. Tolosa ibilbidean bi zuhaitz erori dira, eta zaborrontzi ugari irauli dira.
Itsasoan, nabigaziorako abisu horiak iraungo du gauerdira arte. Donostian 6 metrotik gorako olatuak egon dira, eta eguerdi partean 5 metrokoak espero dira. Gero behera egingo duten arren, 3,5 eta 4 metro artean izango dira gauera arte.
