Iñaki Goirizelaiak jarraituko du EHU Euskal Herriko Unibertsitateko errektore izaten beste lau urtez. Gaur egin dituzte errektorea hautatzeko hauteskundeak EHUn, eta 21:30 aldean jakinarazi dituzte emaitzak. "Oso pozik" dagoela azaldu du Goirizelaiak, eta bere proiektuak babesa jaso duela adierazi du.
Datua behin-behinekoa da oraindik. Boto elektronikoa zenbatzeko arazoak izan dituzte. Baina emaitzak ponderatu eta Goirizelaiak behar zituen botoak eskuratu dituela jakinarazi dute.
Parte hartzea oso baxua izan da. Botoa eman zezaketen 51.643 lagunetatik 5.406k eman dute botoa (%10,5). Horietatik 4.566 zenbatu dituzte (%84,4), eta 840 boto elektroniko gelditu dira kontatzeko.
Zenbatutako botoetatik, %55,16 izan dira Goirizelaiaren aldekoak. Gainerakoak zuriak eta nuluak izan dira, ez baita beste hautagaitzarik aurkeztu errektoretzara.
Boto zuria zuen arerio nagusia Goirizelaiak, hain justu. Botoen heren bat bere aldekoa izatea lortu behar zuen, gainontzean errektoretza eskuratzeko gutxienekoa ez baitzuen lortuko.
Oraindik azken emaitzak ez badaude ere, talde guztietan nagusitu da Goirizelaiaren aldeko botoa, administrazioko eta zerbitzuetako langileen arteko botoetan izan ezik.
Ikasleen parte hartzea, berriz, bataz bestekoa baino txikiagoa izan dela jakinarazi dute.
Boto neurtuaren sistema erabiltzen dute EHUko errektorea aukeratzeko. 2.239 irakasle doktore iraunkorrei emaitzaren %56,25 dagokie; doktore iraunkor ez diren 500 irakasleei, %7,5; gainerako irakasle eta ikertzaileei —2.779 dira—, %2,09; administrazio eta zerbitzuetako 1.884 langileei, %22,08; eta 44.241 ikasleei, %12,08.
