Jaurlaritza berria osatzear dagoela egitasmoak aldizkari ofizialetan argitaratzea susmagarritzat jo dute ekologistek eta egitasmoen kontra dauden erakundeek.Egitasmoak bideratuta utzi nahi izatea leporatu diote jarduneko gobernuari. Hori ez dela egia esan du Zudairek, eta ematen ari diren pausoak administrazioaren prozesuaren barrukoak direla. Are gehiago, Eusko Jaurlaritza parke guztien ingurumen eraginaren azterketa bateratua egiten ari dela jakinarazi du.
Hiru aldundiek Haize Energiaren Lurraldeko Sektore Planak aurreikusten dituen egitasmoen azterketa bateratua eskatu zuten. Hala, egitasmoen ingurumen eraginaren azterketan parkeak barkaka egiten dira, planaren arabera, baina zentral eolikoek elkarren artean eragin dezakete, eta kaltea larriagotu; kasu horietan bat gehi bat ez du zertan bi izan, Arabako Foru Aldundiko iturriek azaldu dutenez.
Jaurlaritza azterketa bateratua egiten ari da, eta emaitzak ekainerako izango ditu. Emaitzei gehituko zaizkie aldizkari ofizialetan argitaratu diren egitasmoei aurkeztu zaizkien alegazioak, eta horretan oinarrituko da Ingurumen Saila azken erabakia hartzeko. Orduan ikusiko da aurrera egiten duten parke guztiek, gutxi batzuek edo bakar batek ere ez.
Ekologisten mesfidantza
Ekologistek eta parke eolikoen egitasmoen kontra dauden erakunde batzuek, Arabako Aldundiak kasu, Jaurlaritzak eman dituen pauso horien berri ez dutela jakinarazi dute. Are gehiago, legea alor horretan oso argia dela azaldu du Izate elkarteko ordezkari batek. Informazio publikoa argitaratzean egitasmoa itxita dagoela esan du, eta behin horrek aurrera egiten duenean aldaketa txikiak baino ezin direla egin.
Halaber, salatu dute Haize Energiaren Lurraldeko Sektore Planaren berrazterketaren inguruan informazio gutxi jaso dutela. Eusko Legebiltzarrak 2008ko martxoan plana sei hilabetean berraztertzeko agindu zion Jaurlaritzari, baina hori egiteko epea bukatu den arren emaitzen berri gutxi izan dutela esan dute.
Jaurlaritzak berrazterketa egin duela argitu du, ordea, betiere Legebiltzarrak emandako epeek ahalbidetu dutenaren arabera. Lurraldeko Sektore Plana egiteko, bost urte behar izan ziren, eta berraztertzeko denbora hori beharko litzatekeela dio Zudairek. Berrazterketa egiteko,legeria hartu eta 2002ko Haize Energiaren Planaren egitasmoek legeren bat urratzen duten aztertu dute. Hori egin ostean, hegaztiei kalterik ez egiteko, Alda-Arlaba eta Arkamuko egitasmoak aldatu dituzte. Arkamukoa 0,7 kilometro laburtu dute -7,1 kilometrotan geratu da- eta Alda-Arlabakoa 0,5 kilometro -4,3 kilometrokoa da-.
Natura 2000 Sarearen barruan daude parke eoliko batzuk. Sare horrek interes bereziko guneak babesteko helburua du, baita arriskuan dauden hegaztien inguruak zaintzea ere. Zudairek adierazi du posible dela bertan haize erroten parkea jartzea baldin eta errotek Natura 2000 Sareak babesten duen horri kalte egiten ez badiote. Egitasmoen kontra daudenek hori onartezina dela deritzote, eta sare horrek babesten duen gunea errespetatu behar dela deritzote. Hala, errotek kalte egin ahal diete hegaztiei -hesi efektua...- eta errotak jartzeko lanek inguruari kalte egiten diote.
Lurraldeko Sektore Planaren barruan haize parkeak beste toki batean kokatzeko aukera aztertu dutela jakinarazi du Zudairek, azken urteetan egon diren teknologiaren aurrerapenak erabilita. Kokaleku horiek, ordea, ez direla bideragarriak esan du. Potentzia gehiagoko errotak egiten dira, eta errota gutxiago behar dira potentzia bera lortzeko; errotak mugitzeko behar den haizearen abiadura ez da aldatu, ordea. Haizeak lau eta sei metro segundoko abiadura izan behar du gutxienez, eta hori egungo kokalekuetan gertatzen da, Eusko Jaurlaritzaren ustez.
Haize parkeak jartzeko kokaleku berrien inguruan txosten bat lantzen ari da Arabako Aldundia, eta laster aurkeztuko dute.
Denbora gutxi barru gertatuko den gobernu aldaketak bidea hasi duten hamabost egitasmoetan ez du eraginik izan behar, Zudaireren iritziz. Patxi Lopez babestuko duen alderdia (PP) energia eolikoaren planaren aurka agertu da Arabako Biltzar Nagusietan.
