Jaizkibiari Herrerako lur sailak emateko prozesua hasiko dute Pasaian

Herrera mendebaldeko eta iparraldeko lur sailak «ez premiazkoak» izendatzeko izapideak hastea onartu du Pasaiako Portu Agintaritzako administrazio kontseiluak. Izapideak bukatzen diren arte, urte inguruko epea igaroko dela aurreratu du Miguel Buen portu agintaritzako lehendakariak, eta, horren ostean, lur sailak «Jaizkibiaren esku» geratuko dira, «Espainiako Gobernuak Jaizkibiaren kapitalari egiten dion ekarpen modura».

Pasaiako Portu Agintaritzak zehaztutako lur eremua 59.191 metro koadro da, eta Jaizkibia erakunde publikoaren esku utzita, Pasaia biziberritzeko baliagarria izango dela nabarmendu du Buenek. «Oraingoz» lan horiek portuko lanekin batera egingo dituzte. Esaterako, Herrerako mendebaldeko lur batzuk portua AP-8 autobidearekin lotzeko erabiliko dira. «Gomistegiko biribilgunera heltzen den zirkulazio astuna bereizteko balioko du», jakinarazi du Buenek 2010eko azken bileraren ostean.