Jaurlaritzak herrien borondatea errespetatzeko eskatu du eta ETAri desagertzeko galdegin

Giza eskubideak errespetatzen ez badira "elkarbizitza eta armonia" bilatzea zaila dela iritzi dio Jaurlaritzak, eta horregatik, "bazterketarik gabe" errespetatu behar direla azaldu du. Bere iritzian, bizitzeko eskubidea da, gainera, giza eskubideetan garrantzitsuena.

"Gizagabetasunak" desagertzeko lana egin behar da gizarte guztietan, Jaurlaritzaren aburuz, eta horretan euskal herritarren badutela lana azaldu du Azkarragak. "Indarkeria mota guztiak" desagertu behar direla aldarrikatu du.

Hala ere, itsaropentsu dago Azkarraga, eta "bizi dugun indarkeria egoera" gainditu daitekeela iritzi dio. Horretarako desagertzeko eskatu dio ETAri. Izan ere, Jaurlaritzaren iduriko hori da "gure gizarteak etorkizuna izateko modu bakarra".

Torturak

Atxilotuen eskubideak errespetatzea ere galdegin du Azkarragak, Jaurlaritzaren izenean: "Ezerk ez ditu tratu txarra eta tortura justifikatzen, ezerk ez du justifikatzen ezarritako zigorrari beste zigor batzuk gehitzea. Eusko Jaurlaritzak berriro ere aldarrikatu du espetxe politikak ikuspegi humanitarioa behar duela delituak egin dituztenen kontrako mendekuari uko egiten diona.

Ideien "kriminalizazioaren" kontra

Esan gabe, baina 18/98 auziaz eta antzekoez ere aritu da Azkarraga: "Demokraziak ezin du biziraun herritarrak susmopean jarrita eta gutxiago ez bazaie uzten eskubideak normaltasunez gauzatzen. Ideiak krimen bihurtzeko tentazioan eroriz gero, tirania ezartzeko eta gizartea lardaskatzeko ateak zabaltzen dira".