Bahiketa saioa gaizki atera zen, baina Larretxea Goñik garbi zuen 1996an Euskaldunon Egunkaria-ri eskaini zion elkarrizketan nola bukatuko zuen bahitua izanez gero: "Ziur nintzen bahituz gero nola bukatuko nuen, banekien garbitu egingo nindutela. Egun batzuetan edukiko ninduten, torturatu eta tiro eman". Elkarrizketa irakurgai dago GALi buruzko multimedia gunean.
Francisco Alvarez Bilboko Poliziaren buruzagi nagusiak prestatu zuen bahiketa hori, eta Julian Sancristobal Bizkaiko gobernadore zibilak ere parte hartu zuen, biek ere gero epaitegietan deklaratu zutenez, GAL auzia sumarioan batek eta Segundo Mareyren bahiketarenean besteak.
ETApm-k urriaren 5ean bahitu zuen Martin Barrios, eta 15erako epea eman zituen Espainiako Gobernuak baldintza batzuk betetzeko: epaituak izateko zorian zeuden bederatzi preso askatzea. Larretxea Goñi ETApm-ko kide zen.
1983ko urriaren 18an, baina, Martin Barrios bizirik zen, Alvarezek berak deklaratu zuenez informazioa atera eta militar espainiarra askatzeko. Bahiketa, baina, gaizki atera zitzaion GALi, eta handik ordu gutxira agertu zen Martin Barriosen gorpua, Bilbo inguruko baso batean, buruan tiro bat zuela.
Lau poliziak egin zuten bahiketa saioa
Alfredo Gutierrez Arguelles inspektoreak eta GEOetako (Grupo Especial de Operaciones) Francisco Javier Lopez Bayen kapitainak eta Sebastian Soto Garcia eta Jose Maria Rubo Garcia sarjentuak hartu zuten parte bahiketa saioan. Larretxea Hendaian bizi zen, eta motorrari erregaia sartzera zihoan poliziek zeramaten autoak jo zuenean. Lurrean joka hasi zitzaizkion eta kaputxa bat jartzen saiatu ziren.
Orduan, baina, jendarme bat agertu zen, eta kolpeak geratu ziren. Errepidearen beste aldera joan eta ikusi zuen Larretxeak nola atxilotu zituen horrek lauak, arma beharrik gabe. "Oso misio delikatuan zeudelako. (...) Hori nazioarteko harreman diplomatikoetan oso larria da. Seguraski, agindua izango zuten operazioa gaizki ateraz gero edo harrapatuz gero kito egiteko. Bide diplomatikotik konponduko zela".
Larretxea Kuban hil zen, 1996an
Lau poliziek ia bi hilabete egin zituzten kartzelan, ordea. Abenduaren 8an –artean, Segundo Marey bahituta zeukaten, eta GALek lau polizien truke askatuko zutela esan zuen– Paueko Auzitegiko Michel Svahn epaile ultraeskuindarrak lau poliziak askatzeko agindua eman zuen. Espainiara joan eta ez ziren gehiago itzuli, nahiz eta Alvarezek "espainiar poliziaren ohorearen izenean" hitzeman zion epaileari poliziak epaiketara agertuko zirela.
Larretxea Goñi ere ezin izan zen joan epaiketara. 1984ko urtarrilean atxilotu eta Guadalupera deportatutako sei errefuxiatuetako bat izan zen. Guadalupetik Panamarako eta Panamatik Kubarako bidea egin zuen Larretxeak, eta hantxe zendu zen, 1996an. Egunkaria-ri emandako elkarrizketan "aktorerik gabeko epaiketa" izan zela adierazi zuen.
