Hirugarren fasean sartzearekin batera, Hego Euskal Herriko hainbat herri eta hiritan zabaldu dituzte kiroldegi publikoak. Instalazio bakoitzaren ezaugarrien arabera, erabaki ezberdinak hartu dituzte leku bakoitzean. Bilbon ez dute gimnasio publikorik zabaldu, baina Artxandan, adibidez, kanpoko igerilekuak, frontoia eta tenisa erabiltzeko aukera dago. Donostian, berriz, zabaldu dituzte gimnasio batzuk, baina igerilekuak erabiltzeko hilaren 22ra arte itxaron beharko dute bazkideek.
Orokorrean, mailakatua izaten ari da itzulera. Usurbilgo kiroldegian (Gipuzkoa), adibidez, gaur zabaldu dute gimnasioa lehen aldiz, baina ez zebilen jende asko. Izan ere, baldintzak ez dira ohikoak. Segurtasun distantziak eta higiene neurriak bermatzeaz gain, erabiltzaileek ordua hartu behar dute kiroldegira joateko, eta makina jakin bat erreserbatu; ordubete dute haren erabilera egiteko. Igerilekua datorren astelehenean zabalduko dute.
Hegoaldeko kiroldegi publiko gehienetan hori izaten ari da joera: datorren astelehenera arte itxarotea. Kirol zentro pribatu gehienak, ordea, zabalik daude joan den faseaz geroztik.
