Kontsulta onartu ezean, Espainiako Estatua Estrasburgoko auzitegian salatzera bultzaltuko ditu herritarrak Jaurlaritzak

Espainiako Auzitegi Konstituzionalak Eusko Legebiltzarraren Kontsultaren Legea eragozten badu, auzia Estrasburgora, Europako Batasuneko Giza Eskubideen Auzitegira bideratuko du Jaurlaritzak. Hala ere, Gasteizko Gobernuak ez du zuzenean erakunde gisa joko epaitegira, baizik eta herritarrak bultzatuko ditu Espainiako Estatuaren kontrako salaketa jartzera. Herritarrak salaketa jartzera eta alderdiak salaketa horiek bideratzera.

Juan Jose Ibarretxe Jaurlaritzako lehendakariak eman du asmo horren berri Donostiako Miramar jauregian, opor ondoren gobernu kontseiluak egin duen lehen bileraren ondoren -ohiturari jarraituz egin dute Donostian-.

Herritarrak salaketa aurkeztera bultzatzeaz gain, Ibarretxek berak eta Jaurlaritzako sailburuek ere jarriko dute Estrasburgon Espainiaren kontrako salaketa "norberaren izenean". Ibarretxek azaldu duenez, Giza Eskubideen Auzitegiari buruzko txosten juridikoak aztertuta erabaki dute epaitegira erakunde gisa jo ordez herritarren bidez ekitea. Izan ere, txosten horien arabera, euskal instituzioek ez dute auzitegira Espainiaren kontra jotzeko zilegitasunik, Estatuaren beraren zatitzat hartzen direlako. Herritarrek bai, ordea, Konstituzionalaren erabakiak haiei eragiten dielako.

Auzitegira jotzeko bide hori irailaren 16an abiatuko du Jaurlaritzak. Izan ere, irailaren 15a da galdeketa urriaren 25ean egin ahal izateko deialdia buletinean agertarazteko azken eguna. Egun horretarako erabakirik ez badago edo kontrako epaia ematen badu Konstituzionalak galdeketa ezingo da egin, eta horren euskal herritarren giza eskubideak urratzen dituela iritzi dio Ibarretxek.