LAB sindikatuak jakinarazi duenez, «elementu arrotzak» —ustez gurgurioak— agertu ziren Barakaldoko El Regato (Bizkaia) ikastetxeko jangelan irailaren 16an zerbitzatutako janarian. Serunion enpresak eskaintzen du zerbitzua, eta, LABek salatu duenez, enpresak, gainera, jangelako langileak «kriminalizatu» ditu: «LABek onartezintzat jotzen du Serunionek erabaki izana jangelako begiraleei errua botatzea, El Regato ikastetxean zerbitzua kudeatzen duen enpresa gisa duen erantzukizuna bere gain hartu beharrean».
Ohartarazi dute El Regatokoa ez dela kasu «bakana». Hain zuzen, 2024an, Eusko Jaurlaritzako Hezkuntza Sailak Serunionekin zituen kontratuak bertan behera utzi behar izan zituen sare publikoko hainbat jangelatan izandako «antzeko irregulartasunengatik»: «Arazo horiek behin baino gehiagotan gertatu izanak erakusten du enpresaren aldetik kontrol eta zorroztasun falta larria dagoela, eta oraindik ere onura ekonomikoa lehenesten duela, zerbitzuaren kalitatearen eta ikasleen segurtasunaren gainetik».
Horiek horrela, LABek «babes eta elkartasun osoa» helarazi die El Regatoko jangelako langileei, eta «eskumena duten erakundeei» eskatu die Serunionen jarraipena egiteko eta jangeletan kalitatea bermatzeko.
