Lana eta familila uztartzeko dirua 4 milioi gutxitu du Jaurlaritzak

Iazko datuekin alderatuz, Eusko Jaurlaritzako Gizarte Gaietarako Sailak lau milioi gutxiago emango ditu lana eta familia uztartzeko politiketarako: 34 milioi eurotik 30 milioira, hain zuzen ere. Seme-alabak zaintzeagatik baimena eskatzen dutenek 3.255 euro jasoko dituzte. Lanaldia txikitzeko eskatzen dutenak ere diruz lagunduko ditu Jaurlaritzak. Lanaldi murrizketa %45etik gorakoa bada, 2.604 euro jasoko ditu eskaria egin duenak; %40 eta %45 artekoa bada, 2.325 euro; eta %33 eta %40 artekoa izanez gero, 2.046 euro.

Seme-alabak zaintzeko pertsona bat kontratatu nahi izanez gero, berriz, gizarte kostuen %93 emango zaie 28.000 euro arteko errenta dutenei; hortik goragoko errentak dituztenei, berriz, %69,75.

Jaurlaritzak eutsi egin die, berriz, seme-alabak izateagatik ematen dituen laguntzei. Guztira, 27 milioi emango ditu. Lehen haurra izateagatik, errentaren arabera, 400 eta 900 euro artean jasoko dituzte gurasoek. Bigarrenerako kopuru bakarra izango da: 1.500 euro. Lehen urtean, 1.110 emango zaizkie, eta 400 bigarrenean. 6.300 eurorenak izango dira hirugarren seme-alabarentzako laguntzak. Haurrak adoptatzen dituztenentzat ere egongo dira laguntzak.

Jaurlaritzak laguntzak emateko egindako ahalegina nabarmendu du. «Beste erkidego batzuetan kendu egin dituzte», esan du Idoia Mendia bozeramaileak.