Euskarazko lexikoa eta terminologia landu eta sustatzeko hamairu tresna aurkeztu ditu gaur Eusko Jaurlaritzak, Donostiako Tabakaleran. Euskara arlo guztietan erabiltzeko oinarriak ezartzea da tresna hauen helburua, Miren Dobaran Jaurlaritzako Hizkuntza Politika sailburuordearen arabera: "Baliabide hauekin euskararen erabilera gure egunerokotasunean normalizatzen jarraitzeko urratsak emango ditugu".
Horretarako, bederatzi hiztegi terminologiko egin ditu UZEIk. Osasun arlokoak dira hiru, eta garraioari, azoka eta biltzarrei, ehiza eta arrantzari, mineralei, eta sare sozialei nahiz telefoniari buruzkoak dira gainontzekoak. Horrez gain, Hiztegibar deituriko plug-in bat ere aurkeztu dute, eta Hizketa Ereduak argitalpena aplikazio bihurtu.
Halaber, Elhuyar Fundazioaren hiztegiaren web orrialdea eta sakelekoetarako aplikazioa berriztu dituzte. Josu Aztiria fundazioko kideak azaldu duenez, euskarazko web orrialdeen artean "Elhuyar bigarrena izan da bisita kopuruan 2017. urtean, Wikipediaren atzetik". Ia bederatzi milioi bisita jaso ditu.
